ديوان الشاعر محمد ابن فطيس المري

يا سارقا قلبي

ياسارقاً قلبي أتتـك جوارحـي
طوعاً بـلا أمـرٍ ولا استئذانـي
فأنـا الـذي أهملتـه وتركـتـه
كنزاً للص هواك حيـن أتانـي
فارفق به مادمـت تملـك أمـره
واحفظه حفظ الصدر للرئتانـي
وإذا لقيتـك فأعطنيـه دقائـقـاً
ليجـدد الحـب بـه شريـانـي
فإذا قضيت فخذه منـي راضيـاً
سبحان مَنْ مِـنْ دونـه أحيانـي
وإذا لقيتك لاتسل عـن حالتـي
فملامحي بالشوق خيـرُ بيانـي
للدمع والليل الطويـلُ تركتنـي
وتقول لي في البعـد ماأضنانـي
عجباً لأمرك كيف عن حالي تسل
أو لم تكن في الهجر من أرداني
عجبـاً لأمر العاشقـيـن لـمـا أرى
لايكره المجنـي عليـه الجانـي
دع عنك ماقد فات واسمع مايلي
فالعمر مهما طال طـولٌ فانـي
داو المسامع بالكـلام وداونـي
بالوصـل إن فراقنـا أعيـانـي
في ليلـةٍ قمريـةٍ كـي أحلـفُ
إنـي رأيـت بليلـةٍ قمـرانـي
واسمع عيونـي كلمـا لاقيتنـي
فأنا عيوني فـي اللقـاءِ لسانـي

عقبال ياماخذ فؤادي مية عام

عقبال ياماخذ فـؤادي ميـة عـام ..
.. ضيعتني منك وانـا مـا اهتديتـك
لا ..ما نسيتك كيف بانساك مـا دام ..
.. ذكرى الفراق تهزني لـو نسيتـك
حبك قدر وانا على ديـن الاسـلام ..
.. مكتوب في وجه الجبين ورضيتـك
لك في الضمير الود والحشمه اتوام ..
.. ولي في ضميرك مثل ما انا بغيتـك
ولك منزلٍ في نايف القلـب وخيـام ..
.. وذود الغـلا ترعـاه ولا شكيـتـك
يفطر عليك القلب وان فارقك صـام ..
.. والله لونك شـوك سـدره كليتـك
القلب طيرٍ لادعـي للهـوى حـام ..
.. والا انت وكره من كثـر ماهويتـك
كن العيون من النظر عقبـك ايتـام ..
.. وكني ماريت الا انت من يوم ريتك
وكنك معي وانا فقدتك مـن اعـوام ..
.. مـع الخيـال القـاك كنـي لقيتـك
من صعب وصلك ما تهنيتك احـلام ..
.. وان جابتك فزيت شـوق ومحيتـك
يعني وصالك صعب واهدافي اوهـام ..
.. يعنـي زرعتـك للقـدر ماجنيتـك
صبرك يقولون العرب كـل الايـام ..
.. يوم عليـك ويـوم لاجـاك جيتـك
ويا قلب ياللي ورثك اجـروح وآلام ..
.. بليتنـي ماهـو بانـا اللـي بليتـك
ولعتني من عادني في الهوى خـام ..
.. واسرفت بي وانا خطامـك عطيتـك
طعتك وزبدة طاعتـك هـم وهيـام ..
.. مالله كتب لي واستخرت وعصيتـك
لوللقلـوب اسـواق بايـع وسـوام ..
.. لاابدلـك وان جيتنـي ماشريـتـك
والا انت ياللي جيش عينيك مقـدام ..
.. لا اقنعت منـك والرجـا مارجيتـك
كني سجين بين..افـراج ..واعـدام ..
.. وكنك سجن وانـا بنفسـي بنيتـك
تنبيك عن حالي محاصيـل الالهـام ..
.. وتخبرك نظراتـي نهـار التقيتـك
عقب الوصال اللي على عين من لام ..
.. قدهو يكفيني عن الوصـل صيتـك
وقدني الى مريت بالشـارع العـام ..
.. لديت من ما في الضميـر ودعيتـك
ادري ان صوتي ماقطع عشرة اقدام ..
.. وادري بي اعود الى مـن نصيتـك
ياشينهـا يامحنـيٍ راس الابـهـام ..
.. ماقدر على شوفك وانا عنـد بيتـك
الاعمار ما تضمن وانا اخاف الاحكام ..
.. ارثيك خـاف اودعـك مـا رثيتـك

أعز الكويت وشعبها والقلوب شهود

خليفة عزمني عبر جوال اخوي سعود
وخليفة دروب الطيب نهجه وسيسانه
من ال الصباح وذكرهم مع هبوب النود
وتاريخهم ما ينكره كون عدوانه
وانا أغلي سعود وحاسبه مثل اخوي العود
سعود الفهد والطيب يمشي بشريانه
صديقٍ صدوق ورفقته كل يوم تزود
ما هي رفقة اللي لا التفت صاحبه خانه
قبلت العزيمة ود ماقصدي المردود
خليجي وفي داره ومن بين صدقانه
انا ما اعترف ان بيننا فالخليج احدود
هذا خال هاذولا وذولاك جدانه
واعرف ان جمهور الشعر فالكويت احشود
يعرفون قدر الشعر معناه والوانه
اعز الكويت وشعبها والقلوب شهود
ونفسي لراعي الطيب ما هي بخوانه
مواقف قبايلها معي موقفن محمود
صغير وكبير الشعب حضره وبدوانه
وموقف جماهير الشعر ما هو بمجحود
لو الود ودي اشكر الكل باذانه
ولا اسج من ربعي هل الموقف المشهود
بعضهم فضى الرشاش في سكف ديوانه
عسى الله يمن داركم والسلام يسود
وعسى الله يرحم جابر وتبرد اكفانه
عسى الله يجملني وجودي من الموجود
وتلقون عندي ما حضرتوا على شانه
قصيدن يونسكم ولا يقرب المنقود
قصيدن على ساس الادب قام بنيانه
مهو صف حكى ما لقى من حكى به فود
تسامج معانيه وتنتقد على اوزانه
على كل صفحة صورته واقف وممدود
طموحه يحفظ الناس شكله وقمصانه
قصيدن احلاه شوي ومكرر ومعيود
دبل كبد جمهور الشعر طولة لسانه
تبنة ضهوره شلته واعلنت مولود
تلمع له اخدوده وتكحل له اعيانه
اتلفق لقاءاته بقصد النوايا السود
وعن آخر جديد افلان تستفسر فلانه
فلانه سكرتير المجلة ابو محمود
يضلل عقول الناس بافكار شيطانه
يحطون للشعر الصحيح العفيف قيود
والي خافوا الشاعر يقصون جنحاته
يقولون ما جانا على ما نشرت اردود
ومكاتبهم بكثر الاشادات مليانه
والي جاهم اللي ما له الا الله المعبود
يقولون سكرنا عددنا وبيبانه
والى جاهم اللي تسبقه واسطه ورود
يقولون بطلنا عددنا وعمدانه
لكن وقتهم ولا ولا ضنتي بيعود
وبيت بنوه بظلم ما دامت اركانه
ظهر للشعر عزة ومفتاحه المفقود
بعدما انسجن كم عام في جوف زنزانه
وترى اللي بيزعل يعتبر نفسه المقصود
على شان يدرون العرب وين عنوانه

عن مافي خاطري

يامرحبـا ترحيبـة البـدو بالبـرق
اللي لهم عاميـن مـا رحبـوا بـه
رحبه اوسطهم ومن فرحته غـرق
جفنه بدمـع بلـل أطـراف ثوبـه
البرق شرق وهو له صويحب ٍ شرق
وبرَق وصـدره بـارق ٍ مادروبـه
ياللي سرقت النوم والعافية سـرق
يازاد قلب اللـي هـواك وحروبـه
تغيب ماهمك وأنـا ألاحـي الـورق
ولا تخـاف مـن الجفـا والعقوبـه
الوصل مرهم كبد وإلا الجفا حـرق
والصبر ينفض في غيابـك جيوبـه
كسرت كل أبواب وصلك من الطرق
وغيرك طرق قلبي ولانـي بصوبـه
واللي يريد الوصل يامكثـر الطـرق
لو وقفوا كل العـرب فـي دروبـه

كهربتني بالعين

ياللـي دخلـت السـووق وقـف بحاكيـك
وش ذا العيـون اللـي تسـوي سـوايـا..
كـهـربـتـنــي بـالـعــيــن الله يــجــازيــك
نظـرات شـلـت فــي ضمـيـري خـلايـا..
لــولا فـيــوزٍ وســـط قـلـبـي تومـاتـيـك
مـاكــان عـيّــن مـــن فـــؤادي بـقـايــا..
يفصـل إلـى مـن شـاف هـذي وهاذيـك
صــادف مـواقـف مــن بـنــات الـقـرايـا..
قـالــت تـحـمـد يـــوم ربــــي مـنـجـيـك
ولا تـوقــف فــــي طــريــق الـصـبـايـا..
قـلــت الـصـبـايـا والـمـزايـيـن تـفـديــك
ماشفـت عيـنـك فــي جمـيـع البـرايـا..
قالـت هـذي عينـي عسـى الله يقويـك
وشلـون لــو بتـشـوف بـاقـي المـزايـا..
لـكـن مـادامـك مـمـن القـلـب بسـويـك
رح فـــي طـريـقـك والـنـوايـا مـطـايــا..
والا تــــرى بـتـعـبـك وأعــلــن تـحـديــك
وأشـــوف قـلـبــك بيـتـحـمـل حــلايــا..
قلت أسمعي:وأن فزت..قالت: بكافيك
عـلـى حسـابـي مــن مـحـل الـهـدايـا..
بـس أنتـظـر لحـظـه بسيـطـه وأرويــك
ثـــم أظـهــرت ثــغــرٍ زهــتــه الـثـنـايـا..
قـلــت أنـتـبـه يـاقـلـب مـنـهـا تـوطـيــك
وأسمـع صـداه يصيـح خـلـف الحنـايـا..
ثـــم أنـفـجـر جـــد الـفـيـوز التـومـاتـيـك
وأقـفـت وأنــا أجـمـع بقـايـا الشظـايـا..

خيمة بدو

ليهـ المسا عوق الشقاوي وطبّه ؟!!
وليهـ الهبـوب تصحي القلب لا بات ؟!!
وليهـ القمر يدعي جريح المحبّه ؟!!
ويقول لهـ يا هيهـ ما فات ما مات ..
جرحكـ ظهر لو قلت للوجه خبّه
وللحزن في ضحكـك رسوم وعلامات ..
وليهـ المطر بالذات ريحهـ وصبّهـ
كنّــهـ رسول بين الاحباب بالذات ..
اشتاق فيهـ لشوفتك واتنبّـهـ
للي نسيتــهـ من مواقف ونظرات ..
لا استانس الخافق ذكر من يحبّـهـ
ورجع يراجع فالوناسات ما فات ..
يا مرتع القلب الحزين ومربّــهـ
يزيين بــك مثل الذهب صدر الابيات ..
هيهات ينسى القلب شخص ٍ لعبّهـ
وهيات يدلهـ خاطري منك هيهااااات ..
سبك مديح ومدح غيرك مسبّهـ
تقول واذني صوتها تقول لك هات ..
ونبع الغلا عندك وعندي مصبّهـ
ومن الولا في خافقي لك ولاياات ..
وطيفك حطب عيني وعيني مشبّهـ
والشوق برد ٍ ما انقطع لو للحظات ..
ومكانك الصدر ولك القلب شبّهـ
بين الظلوع اللي فردها التنهات ..
ولك بيرق ٍ فالقلب حبك يهبّهـ
شامخ ولا هزه من العذل غارات ..
محبتك فالوقت ذا ما تشبّهـ
الا بخيمة بدو بين العمارات ..
ان شفتني ضايق واهوجس واسبّهـ
اخاف غدر الوقت والوقت دورات ..
(( لا تحسب ان دمعي نزل دون سبّهـ
ابكي من الفرقا وهي مابعد جات ))
اليوم كل امورنا مستتبّهـ
وبكره ماندري وش معه من مسرّات ..
اربّ قلبك مثل قلبي اربّه
ما يخلفهـ شور العرب والمسافات

يالشبرمي وأنت راعيهـا

مبروك ياوافـي الاشبـار
يالشبرمي وأنت راعيهـا
إنئكـد الفـوز بالتكـرار
ولمشكك النـاس نثنيهـا
عادتنا الفـوز والاصـرار
وعادتـنـا مانخلـيـهـا
إرجال قبل نغـدي شعـار
وحصن على الدار يحميها
حضر وبدو راحل وبحـار
أمجادنـا مـن يجاريهـا
من ماضي الغوص للمحار
والبـل وحامـي تواليهـا
أفعالنا في الظـلام أنـوار
الليـل يعجـز يغطيـهـا
داري قطـر للبيـارق دار
رض البيـارق نسميـهـا
نباتها المجـد والامطـار
أمجـاد وجهـود بانيهـا
أميرنا الفـارس المغـوار
هو سورها الـي يذريهـا
غيث على ديرتـه مـدرار
يمطـر لـداره ويرويهـا
يبذر ويجني بهـا الاثمـار
وبالعزم والدعـم يسقيهـا
يغرس سيوف وقلم وأحرار
وتنبت بيـارق بأراضيهـا

دخيلك ياهوا الغربي على قلبي تهب بزين
تراك محمل باشيا تهز القلب وضلوعة
تراك محمل باشيا خفية مستحيل تبين
ولايفطن لها كون الجريح اللي تلوع لوعة
عليك الله وجاه الله تلف يسار والا يمين
ولا تحيي عروق حروج من عامين مقطوعة
تنحرتك وانا اعرف النتيجة دمعة وبيتين
مجموعة هواجيس تخالف هي ومجموعة
وتنفستك وانا اعرفك على روح الشقي حدين
لكن الله امرك وجبني بقدام مقلوعة
وجودي وجد من خلي يقيدة الزمن للدين
وعفيف مظهر الحاجة ولافزعوا لة ربوعة
والا وجد حالي وجد من خلي بشوف الشين
يتيم كلمتة لامن شكى ماهيب بمسموعة
توفى ابية عادة مابعد ينطق اسمة زين
وعاش بلا اخوان وناقع(ن) كمة من دموعة
على اللي راح بفوادي انا دري لية وادري وين
وروح روحة(ن) مجبوعة(ن)ماهيب متبوعة
ملا صدري غلا واقفي وانا ضامي فواد وعين
لو انه غير ودعني علي اهون من الروعة
بنى له في الحشى صور(ن) مثل صور(ن) بني فالصين
يرد العاذل ويحمي ورود(ن) فية مزروعة
حلف لي دين ماينسى وانا اللي قد عطيتة دين
انا ديني على ماهو وهو ماغير طبوعة
على خبري لكني رحت ادور للحقيقة لين
عرفت اسباب ماتقنع وشفت اسباب مشروعة
لونة راح هاجرني علي اهون من الثنتين
مراح(ن) مايبيةوعبرتن فالحلق مقروعة
عسى ربي يسامح كل من لة فالفراق يدين
سبق سيف الفراق العذل ياروحين منزوعة
دخليلك ياهوا الغربي ترى ماني من السالين
ولو بينت لك ضحكة تراها صدق مصنوعة
دخيلك كف والا لف والا غير هب بزين
ترى ماهو يعرفك كون انا ملاوع اللوعة

أنا مسروق .. ؟!!!

شفتك وزاد بـي الولـع والشـوق
غنيتهـا مـن سـاعـة أقبلـتـي
عيني ماقد شافـت كـذا مخلـوق
كنـك علـى ذوقــي تشكلـتـي
قلتي لي أصبر بس أنـا المطفـوق
عجلـت فـي شوفـك وعجلتـي
أثر معك لـي مرسـل ومسبـوق
عـز الله انـك قلـتـي وطلـتـي
عيـن وشفـاه وعاتـقٍ منـتـوق
وجـسـمٍ تغطيـنـه ولااحتلـتـي
الليل عـن وجـه القمـر مفهـوق
والعـود مالومـك إلـى ملـتـي
غصنٍ على ساقـي وفيـه عـذوق
وش الغريبـه لـو تمايلـتـي ؟!!
لكن قبـل تمشيـن أنـا مسـروق
من صدري قبل شوي وش شلتي؟!!
أتلى العهـد بـه قابضـه معلـوق
مـن ساعـة أقبلتـي وحولـتـي
ماريتـه خالـي وفـيـه فـتـوق
رديــه .. وأعــدك تجملـتـي

مجاراة قطـري بن الفجـاءة

أقول لها وقـد طـارت شعاعـاً
من الشعـار ويحـكِ لا تراعـي
عليش الصبر والباقـي علـى الله
وعلى التصويت ماللخوف داعي
ترى اللـي كاتبـه ربـي بياتـي
ولو ماسعى لحظي جاش ساعـي
تحزمـت بقصيـدي والقبـايـل
وجاء شعري على الدفع الرباعي
انا في مركب الشعـر الحقيقـي
وجمهور الشعر حسبت شراعـي
امامـي لجنـة كفـواً باهلـهـا
وعلى الشاشات لي جمهور واعي
ومادام ان ديرتـي دار التميمـي
فأنا ماظنتـي يحجـب شعاعـي
تربينـا علـى حـب الطليـعـة
وندعس للوطـن روس الأفاعـي
نعيش لرفعتـه ونعيـش لأجلـة
ونموت لعزتـة مـوتً جماعـي
قطر داري ودار ابـن الفجـاءة
بـلاد نبتهـا سيـف ويـراعـي
ظهر ابن الفجـاءة فـي زمانـة
وانا(ابن فطيس)تظهرني ذراعـي

دكتور العيون

(يامؤمن الريفي )انا جيتك زبون..
.. جيتك على مدح اكثر الناس وعنيت

جيت وتعالى الله عمّا يشركون..
.. لولاه (يامؤمن) لطبك ما اهتديت

راضي بحكم الله علي مهما يكون..
.. عالج عيوني لو بعد طبك عميت

ودي اخاشر فالبصر من يبصرون..
.. واشوف دربي لا سرحت ولا ضويت

والى قنصت اثبت مع اللي يثبتون..
.. واشوف طيري كل ما اوميت ودعيت

ياااكثر ما يضرب خويي ( الطبلون)..
.. من كثر ما اكلّته مطباات وكليت

وودي اشوف اللي علي يعرضون..
.. وبعض الليالي ودي اسري دون ليت

وااشوف ناس ٍ فالقفا ما يرحمون..
.. اما وقفت لصاحبي والا مشيت

من دون نظاره ولا هم يحزنون..
.. يااا كثر ما كسّرت كشمات وشريت

لكنٌ يا دكتور جعلك ما تهون..
.. ابغيك كلمت راس دامك ما بديت

اسمع......ولا ابغي اللي وزانك يسمعون..
.. ربي كتب يكشف لك اسراري وجيت

صورة عديل الروح عندك فالعيون..
.. واخاف تقطعها بموسك ما وعيت

ولا عليك امر..اطوها تحت الجفون..
.. وعقبه لو تقطع عيوني ما شكيت

هي راس مالي والعرب ما يدركون..
.. اني على باب الممات و ما حكيت

ياقو قلبي يوم قفن الضعون..
.. اللي على ذاك الموادع ما بكيت

ويا صبر صبري والعواذل يحسبون..
.. اني دلهت من الهوى والا سليت

اسكت عساهم من سكاتي يسكتون..
.. وانا عن اللي في ضميري ما انتهيت

وادور الفرحه مع اللي يسهرون..
.. وان ذكروني خذت فنجال وسريت

اخذت من وقتك يا دكتور العيون..
.. عالج عيوني لو بعد طبك عميت

واستر علي واللي معك لا يفطنون..
.. انت الوحيد اللي بعد ربي دريت

لا ضاقت الدنيا

لا ضاقت الدنيا عليك وتشاويت ...... خلق الله اللي فالرخا كان واجد
ومن العرب والصوت والثوب مليت ...... وقامت عليك هموم بأقعا تراجد
فارفع يديك لخالقك لا توضيت ...... وادعو تراك أقرب إليا صرت ساجد
ووقت من أوقاتك للأوقات توقيت ...... وسجل لنفسك في المساجد تواجد
وأبشر بفزعة حامي الدين والبيت ...... إليا هجدك من الهواجيس هاجد
اللي يميت الحي ثم يحيي الميت ...... لرضاه شف كثر البشر بالمساجد

"مركب الشعر"

أقول لهـا وقـد طـارت شعاعـاً ............ من الشّعـار ويحـك لا تراعـي

ترا اللـي كاتبـه ربـي بياتـي ............ ولو مساع لحظي جـاش ساعـي

عليج الصبر والباقي علـى الله ............ وعلى التصويت ما للخوف داعي

تحزمـت بقصيـدي والقبـايـل ............ وجا شعري على الدفع الرباعـي

أنا في مركـب الشعـر الحقيقـي ............ وجمهور الشعر حسبت اشراعـي

امامـي لجنـةٍ كـفـو بأهلـهـا ............ وعلى الشاشات لي جمهور واعي

وماـدام إن ديرتـي دار التميمـي ............ فأنا ما ظنتـي يحجـب شعاعـي

تربينـا علـى حـب الطليـعـه ............ وندعس للوطـن روس الأفاعي

نعيش ارفعتـه ونعيـش لأجله ............ ونموت لعزته موت(ن) جماعـي

قطـر داري ودار ابـن الفجـاءة ............ بـلادٍ نبتهـا سيـف ويـراعـي

ظهر ابن الفجـاءة فـي زمانـه ............ وأنا ابن فطيس تظهرني اذراعي

::: سولفوا :::

سولفوا تكفون لا عاد تسكتون
قبل لا أهوجس وياتيني بلاي

السكات يزود طعوني طعون
وتنكسر لا جا على راسي عصاي

سولفوا لو ما بغيتوا اتسولفون
قبل لا اقعد في الحزن رايح.. وجاي

واضحكوا لو بالعماله تضحكون
وجاملوني لو يضايقكم حكاي

لي وليفٍ راح جعله ما يهون
هو دواي وداي .. أو داي ودواي

راح لكن طيف زوله في العيون
مرةٍ قدامي ومرة وراي

وإن سكتوا جا وهو طيفه يمون
رحت أهوجس له وأبين له ولاي

مكسب عيوني من الفرقا مزووون
تمطر لطاريه.. والبرق ؟ أصدقاي

كل ما طروه لو هم يمزحون
احرموني من غداي ومن عشاي

أدري إنه ما تناسى الود كون
تسمع إذنه في قفاي اللسن عداي

وكانهم قالوا نسيته يكذبون
وإلا أنا فيه أمتلك نظرة وراي

كان حبه لي على خبري مصون
والله ان كني بقدري .. وبغلاي

ذي بقايا الحب وأطلال الجنون
والله أعلم في ضميره وش بقاي

غير طيعوني ولا عاد تسكتون
ولا والله إن أسمعكم بكاي

[::: في كفها خاتم :::]

في كفها خاتم وفي خدها خال ..
.. وفي عينها غيم وعمارات وبيوت

الخال شفته واضحٍ من ورى الشال ..
.. والخاتم الماس مرصع بياقوت

والعمر في العشرين كني مانيب زال ..
.. والجسم كنه من جبل ثلج منحوت

جبل ولكن لا طرقه الهوى مال ..
.. وخطواتها ماهي بالأمتار بالفوت

ماهي تشوف الشمس من ظل الاظلال ..
.. ومصيافها ما بين لندن وبيروت

الشمس لو تشرق على جسمها سال ..
.. كنها مجسم محلبيه وبسكوت

ومن صغر مبسمها شقى حالها الحال ..
.. ما تاكل الا اللوز والخوخ والتوت

ماهي تشوف الناس تمشي وتختال ..
.. ومرٍ على جاكور ومرٍ على حوت

وخدامتين وهي بلا زوج وعيال ..
.. وسمعتها تدعي الدريول يياقوت

وثلاث جوالات ماهو جوال ..
.. ومن يوم خلقت كل شيٍ بريموت

لكن قلبي مالها فيه مثقال ..
.. وش قرب البشت الحساوي من الكوت

ياجعلها للي خذت قلبي نعال ..
.. اللي غلاها عندي الشرب والقوت

حوريةٍ من فوقها الليل شلال ..
.. كنها صبحٍ فوقها الليل مكتوت

قلبي لها من كثرة الشوق مشخال ..
.. وللسر عن كل المخاليق تابوت

تنحت لي من الحب في القلب تمثال ..
.. وحبي لها ينحت على الساحه بيوت

في عينها ماكل رجال رجال ..
.. وأقصى حدود الوصل في سلمها الصوت

زودٍ على القلب وعلى الحسن من آل ..
.. روسٍ لهم روسٍ على متونها بشووت

الى رضت موتوا يا أهل روس الأموال ..
.. وإلى زعلت جربت وش سكرة الموت

من دونها رجلي وراكب وخيال ..
.. والسيف والأمواج والبحر والحوت

» قصيدة وش فايدة حبك وانا منك محروم الشاعر محمد بن فطيس المري
» شيلة يامومن الريفي انا جيتك زبون مع الكلمات للشاعر محمد بن فطيس المري
» ديوان الشاعر عايض بن زوير المقاطي
» اشهد انك مجنون يا محمد بن فطيس
» شاعر البادية الشاعر محمد بن عبدالمطلب ابي الخير الجهني المصري

ديوان الشاعر محمد ابن فطيس المري

ديوان الشاعر محمد ابن فطيس المري

مواضيع مماثلة

مواضيع مماثلة