امزح ولكن خل مزحك في حدود
ومن لايحب المزح لاتمزح معه
المزح بعض احيان مروي للكبود
لكن ليا من زاد ضربه موجعه
واتعب على خوة عريبين الجدود
اللي معك فالضيق ولا فالسعه
واحذر تعاشر راعي القلب الحسود
اللي ضرره اقرب لك من المنفعه
وابعد عن مخالط مبيحة السدود
واللي على نقل الحكي متجمعه
خليطهم ان ماورد همج العدود
والا سمع شي ماوده يسمعه
واليا عطيت انسان ميثاق وعهود
خلك وفي وادفع كثر مايدفعه
ولا تقابل راعي الطيب بجحود
وأحذر من اللي طيبها تتصنعه
وان شفت طبع الظلم فالعالم يسود
أحذر من المظلوم لا هل اربعه
له دعوه ليا من دعا ترقا سنود
ومن صابته دعوته ماطاب وجعه
وان شفت من نظرات اقاربك الصدود
حبل التواصل بينكم لاتقطعه
واصبر ولو ما انته عليهم بمحدود
بكره تبي تحصد ثمر ماتزرعه
وأعلم بأن الود لو صابه جمود
شمس المحبه تصهره وتميعه
وان سال في مجراه واروى كل عود
اخضرت اوراقه ولانت افرعه
واليا طلبت وصال ناقضة العهود
دور على اللي بالحيا متشبعه
واظفر بذات الدين من حمر الخدود
يلقى بها قلبك مناه ومطمعه
واعلم بأن العمر ينقص مايزود
واللي يفوتك منه صعب ترجعه
ولا تنظر لماضيك لأنه مايعود
فكر بحاضرك الجديد وسنعه
وأبذل عشان احلامك اضعاف الجهود
وباب الامل بين المحاني شرعه
واثبت لنفسك بين خلق الله وجود
ودور على اللي قدر نفسك يرفعه
واذا فتر عزمك وحسيت ببرود
حفز خفوقك بالطموح وشجعه
نفسك بيدك تقودها للعز قود
وتارد بها عد قراح منبعه
وهذي خلاصة تجربة عدة عقود
وبخط وافين الخصال موقعه
مضمونها يروي معاطيش الكبود
ويلقى بها العاقل مناه ومطمعه
الرئيسية
أمس في 4:12 pm
السبت سبتمبر 20, 2014 8:42 am
