طواك الليل واعياك التعب يافكري المشغول
على هونك ترى الدنيا على ماقيل ملحوقه
اليا من مرني بعض الطواري قلت يالحول
وحارت عبرتٍ داخل جفون العين مخنوقه
واداري ضيقتي مثل الغريم اللي جلاله حول
يلج الصدر منها ويتداعى كل معلوقه
كفاني يالهموم اللي ترازم في الحشى وتجول
ترزام السحاب اللي لعج في عرضه بروقه
نشف عود الصبر ما باشره برق الحيا بسيول
تباريح الرياح اركت وشهب لون زملوقه
رجيته مثل مايرجي حقوقه سدرة الغرمول
تعرت من ورقها والمزن ماهلت حقوقه
قضيت من الفصول الاربعه صابر ثلاث فصول
شماريخ النخيل اللي غرسته مالت عذوقه
هدوء الليل يسري بي ولو مسرى العتيم يطول
اسوق إله القدم سوقة شجاع ٍ قفو بنوقه
وانا في جنح ليل ٍ ضمني في ستره المسدول
ادله خاطري وادله بفكر ٍ ساق طاروقه
طواك الليل وأعياك التعب يافكري المشغول
على هونك ترى الدنيا على ماقيل ملحوقه
الرئيسية
أمس في 4:12 pm
السبت أغسطس 10, 2019 7:30 am
