حسرة بقلبي ساقت هموم واحزان .. وفراق بعد فراق ورحلة طويلة
واليوم هذا اليوم تسعة رمضان .. سبب جروحن في فؤادي مهيلة
ماهو سبب جورن وظلمن وبهتان .. الا بلاوي فوق صدري ثقيلة
من صاحبن ناسي على مر الازمان .. وكن المحبة في عيونه قليلة
شاعر ولد شاعر وساطي وخرمان .. وابني بيوتن للشعر مستحيلة
ياصاحبي شاعرك عاشق وهيمان .. ولجلك تضيع بالدروب الطويلة
اصبحت تضحك لي وانا حيل طربان .. واخيل حرفك مثل غر المخيلة
وامسيت فاقدكم وضايق وطفشان .. مثل الذي شال الجمر في شليلة
لعل ما قلناه نزوات شيطان .. واعوذ بالله بالمحن والتجي له
ولعل ما قلناه كان وياما كان .. ونسيان هاك الوقت خير وفضيلة
وش حيلة المشتاق لا صار ضميان .. ميت عطش لام العطايا الجزيلة
ماهو جفى الا عتب بين خلان .. ما احلى العتب بين الخليل وخليله
وقبل الختام يارب ياعالم الشان .. تستر على بنت الرجال الجميلة
اللي لها بالقلب بيرق ونيشان .. ووسط الضلوع احباب وجيش وقبيلة

صح لسانك لاهنت