فداك الكرى يا هاجسي والهجوس رقود
مجاضيع في صدرٍ عنا الوقت ماضده
عليك وعلى دعواه زهر النجوم شهود
اليامن غارات الدجى جات منهده
تجوب الضمير وتستبيحه بدون حدود
الين ان مفتول العزايم وصل حده
وجاء للمعاني في خشوم المزون رعود
وقامت تواشى في سما الفكر محتده
وهلت على بيد الظما وازهر المردود
وانا اللي تجاهلت الطواريق من مده
بعد ما امتهنها الفج والمجحف النمرود
ورجم الغنا كلٍ تهقواه من جده
علام الضعوف استرسلوا فالردى يا سعود
وأنا أقصر وزلات الجهاهيل ممتده
طمع راعي الخمعات في حلمي المعهود
ولولا الترفع كان قد جاه ماسده
ترفعت حشمة لا تخاذل وضعف زنود
ما ابيها يابوفيصل تجي داخل البده
عذرت السفيه الغر واضحى السفيه العود
بغيته يرد الخايعة وانفرث سده
وانا اللي بذلت الجود والمنصفين شهود
لكن الهزيل النذل وش تنتظر رده
وانا أقول للسيد واثني على المسيود
أهل هدة ياويَّها فالقفا هده
سراب النيا والبعد ياهل القلوب السود
جزاكم وعن شوفتكم الصده الصده
وساع الفجوج وخوة الجرهد الممدود
ملاذ الكريم الحر عن هاته ووده
عن مصادم الجهال فالمحفل المشهود
بحجة حكيم حجته تنقلب ضده
وانا وش مصبرني على مجلس المنقود
وعلى لجة الجهال.. حد الخبل رده
وش ارجي من الناقص وهو يدعي بالزود
لو النقص منه ومن حفيده على جده
خبيث الدغايل راعي الكبوة الممرود
رفيق الرخا اللي جوده الشمت فالشدة
لحى الله زمان المال خلى القرود فهود
وصار الهلامه ما يشوف العرب قده
تجرى على سهج المجالس بدون قيود
ولا يرتدع مهما تلوحه على خده
تبجح بعد علا رصيده معاش الخود
واشاد القصور وماقف اهل الوفا هده
ولو يمدحه حامد ولو يمدحه محمود
يمد البخيل المد ماهوب من مده
وانا اللي بعرف اهل الوفا والندى مسنود
ونفسي بهم عن جملة الناس مستده
وانا ما امدح الهافين وابحث عن المردود
والبِّس وشاح القيل من لا يجي قده
أماري براع الجود لو هو بعيد جدود
خطاة ابلجٍ بابه عن الضيف مارده
بنى سمعته بالعلم والحلم والمجهود
تفانى وعلا صرح الأمجاد من كده
تسابق معاريفه لمن يطلبون الجود
كريمٍ لو انه يبذل الجزل ما عده
وابن عمي الواقف اليا صار مامن فود
لياصار ما ليديه فالطايلة شده
تجاهلت عرفه لو حدتني ليال الكود
ولو يعترض شبح النظر فيه ما ألده
الرئيسية
الأربعاء نوفمبر 20, 2024 4:12 pm
الأحد يناير 26, 2014 3:11 am
