قلبي مدينة حزن وضلوعي السور .. ودمي دموع مجمرة في حناياي

ووقت زرع صدري توابيت وقبور .. ليته دفني ما خذا احلام دنياي

الهم والحرمان والياس والجور .. متعسكره فيني من اقصاي لاقصاي

وذاك المكان اللي من الناس مهجور .. ياما هربت إليه ودموعي غطاي

تعبت ادور فالسماء ومض بلور .. اشوف به دربي واميز به خطاي

وتعبت اكون الصادقه شعر وشعور .. مع نفسي وناسي وحتى مع اشياي

مابي كسر فيني من احبابي كسور .. مابي وجع بس الوجع شل يمناي

في واقعي غياب وفي قلبي حضور .. ولالي وطن في ارضهم غير منفاي

ما اقول انا اغليهم بس القلب مجبور .. يزرعهم بدمي ويمشون باعضاي

ما اعرف الف إن ضاق صدري ولا ادور .. احتاج لي قلب به افيض بكاي

ولو اعرف اعاتب خطا الغير واثور .. ماكنت ادور لاتضايقت مسراي

بعض الشعور يموت ما يبصر النور .. لامن طلبته يحتضر في شفاياي

وجروحي اللي كنها صف طابور .. مليت اغنيها على صرخة الناي

وجفن من مزون المشاريه ممطور .. إينع سهر بعيوني وشب ظلماي

ياحزن وش نوحك مع الدم مسعور .. تنهش بنيبانك خفا الروح جواي

ماتدري اني مات بي منك عصفور .. أكبر طموحه كان قطرات من ماي

فيني ظما وانا على سبعة بحور .. عيت تبل الريق وتغيث صحراي

والدفتر اللي ماتت بحبره سطور .. عجزت افضفض به عن اوجاع علياي

يارب لاضاقت علي عطني شعور .. لو هو وهم ارسم به الحلم وياي